Cara Ngaga Manuk Pansuh

Akai dai... nama meh tekenang ka manok pansuh maya tengah baka tu aaa.... hehe... nda lama gi pulai ka menua... puas2 ka meh makai manok pansuh...





Dalam jaku Iban, pansuh tu reti iyanya nyumai nama bansa lauk tauka utai dempa ba dalam buluh. Cara nyumai bakatu beresi sereta nyamai laban kitai enda kiruh bekena ke periuk genuk. Paling penting dikena kitai ianya buluh ke cukup pemesai lalu buluh ke berisi lauk tauka barang dempa tu dilulun ba atas api tauka bara kayu.
Lauk ke disumai dalam buluh tu ngasil ke aroma, tekstur enggau asai ke unik enti dibanding ke enggau lauk ke disumai ba periuk genuk. Kitai tau milih nyumai barang bansa dagin, ikan, manuk, sayur tauka asi ba dalam buluh tu.
Penyediaan barang kena mansuh bepanggai ba diri empu. Bisi sekeda semina becampur ke garam enggau lada, lalu sekeda mega deka nyampur enggau mayuh bansa daun babas.

Pansuh Manuk

Ramuan:
1. Isi Manuk(siku)
2. Lia
3. Bawang Merah
4. Bawang Putih
5. Bawang Bakong/Besai
6. Daun Limau/Bunga kechala(Bunga Kantan)
7. Daun Jabang/Bandung/Empasa
8. Garam
9. Buluh(cukup pemesai)

Cara:
‘Blend’ dulu lia, bawang merah, bawang putih, enggau bawang besai.
Basu isi manuk tadi lalu perap enggau garam.
Perap isi manuk tadi enggau barang ke udah di’blend’ tadi sekali enggau daun limau tauka bunga kechala dalam pengalama 30 minit.
Udahnya simpan isi manuk nya tadi ba dalam buluh lalu tutup mulut buluh enggau daun empasa nya tadi lalu lulun datas api kayu.

Selamat Mencuba...