Cerita ka dibantai ka aku tu legi engka bisi sekeda urang gelesi bulu macha. Aku sampai ka diatu agi gelesi bulu ninga cerita ka ditusui menyadi aku. Laban tu ukai mina sekali aku ninga cerita bansa tu, suah amai dah. Asai ku ukai aku siku ja kala ninga urang tuai diambat bala urang ari menua sebayan. Nyadi cerita tu amai nyadi ba Nanga Ensiring Julau ba alai menyadi aku gawa din. Siku Tuai Rumah ba Nanga Ensiring kala diambat siku indu dara ari menua sebayan ka benama Kumang Pantang Lelangit lalu seduai kala besemaya deka jadi. Utai tu amai nyadi empai lama tu udah sekumbang aku ngabis cuti semester ba menua.
Lebuh maya lemai ari, kenyau abis gaya ba umai dia Tuai Rumah ngenat ke diri lelak lalu ngali ka diri ba dalam langkau. Tak enda berasai tudah iya dia siku indu bajik mua perenching baka bulan perenama mancar malam ari bisi ngerimbai iya gali ba tisi. Tuai Rumah sigi nemu nya ukai sebarang urang indu nang sigi bansa bunsu. Iya ngelar diri enggau nama Kumang Pantang Lelangit. Indu nya lalu angkat serta lari, dia Tuai Rumah lalu ngagai serta nangkap. " Kumang kati ka aku tu, pedis amai ga pengidup aku tu, udah ga merinsa, nadai pemisi, miskin enda ga ngembuan pemandai... aku minta cukup pengasih ari nuan kumang awak enda idup merinsa agi" ku sebana Tuai Rumah. "Owh... enti bansa nya nuan mesti jadi enggau aku, ngambi ka nuan enda idup merinsa" Kenu ka Kumang Pantang Lelangit.
" Kati ka nya Kumang?"
"Nuan mesti jadi enggau aku, awak ka nuan idup senang lantang lalu enda idup merinsa agi, nuan mesti nitih ka aku pulai ka menua sebayan" tusui Kumang ngagai Tuai Rumah.
" Enti baka nya munyi semaya nuan Kumang aku nitih ka aja, lalu kemaya meh tua ulih jadi?" enggau ati ti arap.
" Udah tu lagi aku deka nyimbur ai ajih ngagai mua nuan, laban semaya nuan deka jadi aku, udah tu legi nuan enda ulih meda urang ba dunya nuan, nuan semina ulih meda bansa kami aja ba dunya sebayan". Tuai Rumah nitih ka aja utai dipadah ka Kumang Pantang Lelangit.
"Pegila bisi bala aku ari menua sebayan deka ngambi nuan pulai ke sebayan ba din meh tua jadi" Kumang Pantang Lelangit lalu ngimbur ai nya ngagai mua Tuai rumah.
Pengudah iya ngimbur ai ajih nya ba mua Tuai Rumah dia Kumang Pantang Lelangit lalu lesap. Tuai Rumah lalu mulai ka diri ngagai rumah panjai. Iya enda nusui utai ti nyadi ngagai iya lemai nya ngagai urang ba rumah panjai. Semaya iya deka nyadi enggau Kumang Pantang Lelangit sigi enda ulih disilah ke iya agi. Laban nya semaya antara antu enggau mensia sigi enda ulih dimain-main.
Pagi nya, Tuai Rumah meda pelangi mancar terang ke tanah, ari pelangi nya dia iya bisi meda bala urang ari menua sebayan turun nengah pelangi. Sida bengepan iban magang, ni ka bala sida indu dara ngena baju ngepan iban lalu sida lelaki bersirat, ngena baju burung serta ngembuan tubuh tegap.
"Apu! nyin sida ya datai ngambi aku..." lalu Tuai Rumah pan belanda nuju sida ka bengepan nyin. Enda datai sesingkang ari sida bujang dara ari menua sebayan nya, dia iya ngasai ka tubuh terkering lalu enda ulih engkasak.
"Anang guai mupok dulu kita jang! endu! Aku enda nemu nama kebuah aku enda ulih engkasak! Aku udah semaya engggau Kumang deka jadi engggau iya! Nganti aku dulu kita jang!" enggau leka sabak iya nyerauh.
Lama iya nguji ka ngelepas ka diri, tang enda ga ulih-ulih "Enti baka tu aku enda ulih jadi enggau Kumang... tubuh ku berasai kering lalu enda ulih engkebut.... semaya aku enggau nyadi balang meh..." Tuai Rumah pan udah putus pengarap. Iya cukup berasai sinu.
"Owh.. Enda nyadi iya ka jadi enggau Kumang Pantang Lelangit, pulai meh kitai tu... nuan udah beduan kami, lalu nuan udah bula ka semaya nuan enggau Kumang Pantang Lelangit" kenu ka siku lelaki ari menua sebayan nya.
"Udah tu legi nuan mesti nyedia pemakai ti cukup ngagai kami, kami tu cukup pedis ati dibeduan nuan baka tu, seagi nuan bedau nyedia perengka kena kami makai, kami bedau ulih pulai lalu deka merinsa ka kita ba rumah panjai tu" bala sida bujang dara ke bengepan nya tadi lalu lesap ari mua Tuai Rumah. Pengudah sida iya lesap dia Tuai Rumah nemu diri benung dipasung bala sida serumah. Nya kebuah iya enda ulih engkasak lalu enda ulih nitih sida pulai ke sebayan.
"Kami meda tuai benung belanda tadi serta nyerauh, baka ka bisi meda antu, nya kebuah kami ngetan ka tuai" kenu siku nembiak ka masung Tuai Rumah.
Pengudah arinya, sida serumah lalu begawai sandau ari, nyedia ka piring kena meri bala sida ari sebayan nya makai. Kenyau ari nya Tuai Rumah nadai agi meda sida ari sebayan nya, lalu nadai meda Kumang Pantang Lelangit nya agi pengudah iya udah ulih meda bala sida serumah. Pemujur ai ajih ka diberi Kumang Pantang Lelangit udah abis. Laban kelalu ngenang ka semaya iya deka nyadi enggau Kumang Pantang Lelangit, dia Tuai Rumah nyabak berari. Udahnya iya lalu nusui semua utai nyadi ba iya ngagai bala sida serumah. Nya kebuah kitai Iban nyambut Gawai Sandau Ari ketegal utai ka nyadi ngagai Tuai Rumah ari Nanga Ensiring Julau.
No comments:
Post a Comment